I meseria, kotor anda o barjaripen
Ande rromane familie, i meseria na sikljolas pes ande škola, numa khere. E čhavorre bešenas paše pumare dada, phure dada vaj kake, dikhenas, ažutinas thaj, vaxtesa, lenas e unelte ande pumare vasta. Katar tikne šunenas kaj jekh manuš trebul te avel les familia thaj jekh meseria saveça te ikerel la. Kaj but lendar nas len drom k-i škola, i meseria sas o maj kuč barvalipen savo šaj mukhenas pumare čhavorrenqe.
Kadja kerdile ćaće lačhe meštèra, save, ande pumaro than, nas len praktikes konkurencia. Svako grupo sas les pesqi specialiteta, thaj but anava save akharen adives e rromane grupen aven ćaće anda kadala meserie.
E potkovara thaj e fierara
But šelberša, nisavo gav na šaj kerelas butǐ pe phuv bi životinjenqo, thaj e životinje na šaj kerenas butǐ bi petalenqo. Vaš kodo e rromane potkovara thaj fierara sas trebutne ande svako khetanipen. Von vi lačharenas e unelte vaš e phuv thaj kerenas lanca, karfja thaj balamale.
E lingurara
E lingurara keren butǐ o kašteça jekhe bare ʒanglimaça. Anda kotora fagosqo, teiosqo vaj salciaqo keren roja, polonikura, furkulice, čare, albie, tikne skamina thaj sa e unelte vaš i kuxnja thaj vaš o kher. Varesave obiektura si loke thaj praktikane, aver si len tikne khelimaske detalie, sar e roja kerde mujença.
E bikinitora luludjenqe
E Rroma kamen e luludja thaj i natura. E bikinitora luludjenqe ande kolorura ande pijace thaj pe droma e rumunikane forurenqe, bikinindoj luludja svakone manušesqe savo kamelas lenqo šukaripen. I figura e florăresaqi kerdili kotor anda i rumunikani forosqi kultura, thaj jekh anda e maj pinʒarde lăutărikane gilja, „Florăresele”, gilabadi katar i Romica Puceanu, si dedikime lenqe.
E zlatarura
E rromane zlatarura kerde spektakulozo akcesoria anda rup thaj anda sumnakaj: lanca pe men, braceletura kolorime barrença, angrustja thaj čeneja filigranosa. E tehnike nakhle ande familia, thaj but modelura si len o semno jekhe stilosqo savo pinʒarel pes sigo: barvalo thaj pherdo lumina.
E kalderàra
E kalderàra si e bare meštèra e harkomaqe. Tataren e metalosqe foje pe jag, thaj pala kodo maren len e čokanoça ʒi kaj kerdon ibrikura, tàvă, pirja, kakavja thaj kazanura. Generacie pe generacie, jekh baro kotor anda i rakia e Rumuniaqi sas kerdi ande kazanura kerde katar rromane kalderàra. Paše lende, e tinikigiura keren butǐ i tablaça thaj keren burlanura, kakavja, pâlnie thaj khuvdalura.
E vastune butja adives
I tehnologia thaj i industrialo produkcia line o than e maj bute anda kadala obiektura. E biznisura e meštèrenqe tiknile but, thaj lenqe obiektura bikinen pes adives maj but sar obiektura artaqe vaj sar suvenirura, na sar unelte vaš sako dives. Sa maj cìra terne sikljon kadala meserie.
Sa kadja, paćas kaj e vastune butja si len avutnipen. E obiektura kerde vastença si palem kamle, thaj e tàrgura, e festivalura thaj o kulturalo turismo šaj anen e meštèrenqe jekh nevo publiko. Vaš kodo andam e rromane meštèren pe Balkanik Festival 2016 thaj 2017, kaj kerde butǐ angla šelura manuša.
Galeria
Obiektura thaj meštèra fotografisarde but berša: harkoma, rup, kašt thaj tabla.
