Pa o festivalo
O Balkanik Festival si jekh anda e maj pinʒarde evenimentura anda București dedikime e bašalipnasqe thaj e kulturaqe e Balkanenqe. Varesode divesa, e koncertura, o khelipen, e vastune butja thaj o tradicionalo xabe kiden khetane mii manuša, sa e beršenqe thaj anda sa e riga.
Amenqe o festivalo si o maj lačho than te sikavas aver muj e rromane khetanipnasqo, na kodo anda e nevipena: manuša save ʒanen te keren butǐ, harnikone thaj barikane pe pumari meseria.
„Atelier cu meșteri bestoinici”
Sar ando berš anglal, amaro than pe festivalo akhardas pes „Atelier cu meșteri bestoinici” (jekh atelieri e meštèrenqo) thaj sas les jekh loko motto: talento, pasia, but butǐ. Na sas jekh ekspozicia obiektença šukar thode pe skafidi, numa jekh ćaćo atelieri, kaj e meštèra kerde butǐ katar o detehara ʒi k-i rat.
So dikhle e manuša
- E kalderàra kerde butǐ i harkomaça angla sa: ibrikura, tàvă, kazanura thaj čare save lustrisaile ʒi kaj dine lumina, kerde e čokanoça thaj but răbdareça.
- E lingurara kerde anda kotora kašt čare, roja thaj tikne skamina, thaj pašal lende kidine pes ašćhie thaj manuša bare interesoça.
- E pikture pherde kolorura, inspirime katar rromane mujà thaj paramisa, kerde anda o than jekh tikni galeria artaqi pe bahar.
- E tradicionalo gada, e luludjale coxa thaj e diklora sikade jekh kultura ʒivdi, na jekh muzeosqi.
E čhavorre, e maj šunde spektatora
Maj sigurno o maj šukar momento e festivalosqo sas kana e čhavorre bešle pe drom, pašal e lingurara, thaj dikhle bi vakeripnasqo sar anda jekh buštèno iklel jekh čaro. Khonik na pućhlas savi etnia si e meštèren. Dikhenas numa manušen save ʒanen te keren vareso baro pumare vastença.
Kadava si o drom kontra o rasismo ande savo paćas: maladimata natùralo, kaj e prejudecie naj len than, kaj e manuša si len okazia te pinʒaren pes.
Sostar si important e vastune butja
But anda kadala meserie sikljon pes ande familia, katar o dad k-o čhavo, thaj mangen but berš praktika. I tehnologia thaj e industrialo obiektura ingerde len pe rig, thaj sa maj cìra terne ingeren len maj dur. Sikavindoj len e manušenqe, das e meštèrenqe i pativ savi merinen, thaj anas pe goďi e terne Rromenqe kaj si len sostar te aven barikane. Maj but pa kadala meserie šaj drabares pe patrin Vastune butja.
Galeria fotografienqi
Jekh alosaripen fotografienqo anda e divesa e festivalosqe. De click pe svako fotografia te dikhes la maj bari.
